di Francesco De Luca
Ughetto Little rock, Silverio lollò, Silverio ‘u generale, Antonio Ciacione se so’ truvate stammatina abbasce ‘a piazza. Se so’ assettate for’u bbar ca mo’ se chiamma ‘L’incontro’, ma a i tiempe ‘i pateme se chiammava Bar Amato, e po’ deventaie ‘u bar ‘i Pippo (bonanema).
‘I ‘sti tiempe l’isola andora ‘i ghianeste, ‘u sole fa arapi’ i feneste e ‘a ggente se prepara a gudé’ a staggiona ca se canta, se fa mmuina, i motoscafe iencheno i banchine, e ‘u sorde gira notte, sera e matina.
Ughetto vene ‘a Livorno, Sirverio lollò da Arbatax, Sirverio u generale ‘a Roma e Antonio ciacione ‘a Formia. Tutt’e quatte abbasce a piazza, chi senza diente, chi senza capille, chi c’u bastone e chi c’u boffacazone.
Teneno n’aità, ma ‘u ricordo va a sessant’anne fa, quanno ‘a staggiona, lloro, ereno ‘u turmiento d’i francesine d’u ‘club azur’.
S’i purtaveno ‘ncopp’u vuzzo, a ffà ‘u giro p’i ‘rotte, e a ‘u Mariròc quanno se faceva notte.
Quaccheduna cadeva sott’a botta, e quaccheduna se disperava pecché a vacanza era troppo bella e passava tropp’ ambresse.
“Te recuorde chella vota… ‘i Furmicule… ca facetteme cumparé’ ‘nu pescecane e tu iste a sarva’… comme se chiammava ‘a ‘uagliona… Justine. E chella t’abbracciava e te vasava pecché avive fatto scappa’ ‘u pescecane”. Ciacione e Ughetto ricordano e rireno, e Sirverio lollò conta i ppeccecate c’u zio, Sarvatore, quanno ieve a ffà marenna ind’ a cuntrora. E Sirverio u generale dice ca poco mancaie ca ‘u patre, pe’ ce da’ ‘na calmata, ‘u vuleva manna’ ‘nseminario.
“Avissa fatto ‘na bella carriera, e ce avisse mise a posto pure a nuie…”
“Pecché… ‘i che te lamiente? – dice Sirverio lollò.
Passa na turista e tutt’ e quatte se gireno.
“’I’vvì’llanno – parla ‘a mugliera ‘i Sirverio – teneno sempe ‘a stessa capa. Se so’ fatte viecchie e nun se vonno arrenne”.
‘U fatto è ca… stanno facenno ‘na bona vecchiaia ma… hanno fatto ‘na giuventù ca era cchiù bella ‘i ‘nu suonno.
Questa la versione recitata
