di Francesco De Luca
–
Affinché non si dica che le isole sono come stagni distanti dalla grande Storia, propongo questo ricordo di Mussolini a Ponza, tratto dalla mia raccolta di poesie in vernacolo: Come l’agave – 1982.
Mussolini a Ponza
Ponza n’era posto ’i cartuline
quanno ce venette Mussoline.
A dice a verità ce ’u mannaieno i Fasciste
d’u Gran Consiglio decenno: “va a ffà ’u turiste,
ce pensammo nuie a manna’ annanze ’a barracca,
tu ce staie purtanno c’a capa ind’u sacco;
’a ’uerra ‘a facimmo cu prete ’i pommece e fierre ’i cazette (1)
e a ggente se lamenta c’a curreia (2) se fa sempe cchiù stretta.
T’ hè fatto chiamma’ Duce
e a nuie c’è rimasto senza luce.
Sta’ a ssentì: vattenne a Ponza
llà t’ addefrische (3) ’a capa e ’a panza”.
Cu ’a coda ammiezz’i cosce (4) Mussoline ce sbarcaie
e chi ce truvaie?
I cuàtte (5), chille ca ce avevano fatto passa’ i uaie (6)
e isso pe’ se vendica’ aveva mannato a Ponza ’mpriggione:
cumuniste, sucialiste, anarchece e lazzarune.
“Vide, vi’ che cumpagnia,
hè fatto ’u capo pe fenì mmiezz’a ’na via”.
Accussì penzaie u brav’omme, appena sbarcaie d’u vapore
e se ne iette a Santa Maria (7) addò ce avevano appriparato ’na casa ch’era n’ amore.
A matina se faceva ’a passiata,
po’ leggeva pe ffà vedé ch’era ’nfurmato:
nun parlva cu nesciuno
pe ’nse mette a livello d’i cafune,
e aspettava comme ’nu ciucciariello ’u padrone
ca i tedesche ’u levaveno ’a chella priggione.
E accussì venetteno
e ’nte dico chello ca succedette.
Azzò, i Tedesche pe ffà ’sti cose t’hè luva’:
llà pareva ch’ereno venute a piglia’ ’u maraggià.
Allora sì, Mussoline
se mettette pure ’a brillantina.
Dette a mano a i pescature
parlaie c’u farmaciste, ’u paricchiano, i dutture.
“Voi che vivete qua
– decette – dovete essere cuntente di non stare in città;
qua avete un incanto di paese
e perciò che io avevo lasciato Roma (senza offesa),
ma il dovere mi chiama altrove
e nun saccio manco addove;
voi siate buoni Italiani
ché il Duce penserà al vostro domani”.
A chell’asciuta (8) i Punzise se guardaieno ’nfaccia llà pe llà
e nun reretteno pe dignità
e quanno ’a varca se mettette ’mmoto
pensaieno: “Nun ce futte n’ata vota”.
Note; 1 – espressione gergale per dire: con mezzi inadeguati; 2 – cinghia; 3 – rinfreschi; 4 – espressione gergale per dire: contrariato; 5 – chi era a Ponza in domicilio coatto; 6 – guai ; 7 – contrada di Ponza; 8 – battuta.
Questa la versione recitata
