di Francesco De Luca
–
Sento la precarietà del momento e, come l’uomo fa, cerco un rifugio.
Da un lontano passato di violenza è ritornato vitale trovarsi un rifugio !
Primma ’i stasera
Aggia trasi’ i panne ca stanno fore,
nun voglio ch’a rusata ’i bagne ancora.
Doppo ca ’u sole ha pure prufumate
si se ’nfonneno e se sciupeno, è ’nu peccato.
’A stessa cosa m’aggia decide a ffà
primma ch’a sera mia vene a bussa’.
Ce vulesse fa truva’ sistemate
Apprimm’a tutto chello ch’aggie ’mparato.
Croce e fiure, resate e dulure
vàleno surtanto si serveno a cagna’ ’u futuro.
Si tutta ’sta ’mmuina ca sto vedenno
m’ha ’mparato surtanto comme s’accatta e venne,
aggie perduto ’u meglio ’i ’sta passiata:
sto chino come ’na votte, ma tengo ’a vocca seccata.
Pecché ’a cca niente te puorte appriesso,
e si a tutte chille attuorne l’hè fatte fesse
nesciuno megli’i te sape ca quanno magne sulo,
’u muorzo ’ntorza ’nganna (1) e nun l’assapure.
E po’, primma ca ’sta sera me cade ’ncuollo,
vulesse ferni’ ’stu iuoco ’i tira e molla:
cca ce fanno crede ch’a vita è appriparata
comme ’a televisione ce ha ammuccato (2),
e nuie stammo sempe aspettanno ca vène ’u bello
e struimmo l’uoglie ca serve p’a lucella:
’Ncielo i nuvole hanno disegnato mille figure
e nuie ammo visto sulo ca dopo ’u iuorno vene ’u scuro.
Mò basta,
’u sole cala e ’u cielo s’è fatto niro,
piglio ’sti quatte panne e m’arretiro.
’A puttanata mia ie aggie ditto,
pigliàte ’u meglio e levatece ’u sfriddo.
Note
La poesia fa parte della raccolta Sische ’i recchie (2006)
Glossario: (1) Si ferma in gola; (2) indottrinato.
Questa la versione recitata:
