di Franco De Luca
Innescato dalle ultime parole del ricordo della madre, di Gennaro (leggi qui): “…mi è venuto il rammarico, che tuttora persiste, di averle donato poco tempo” Franco ci invia questa sua sentita testimonianza poetica.
La Redazione
Leggi qui di seguito, mentre ascolti il file mp3:
N’ata vota
Viene cca, figliu mio
parla ’nu poco cu’ mme.
’U saccio ca tiene a che ffa’,
ma… viene cca
parlammo ’nu poco.
.
Papà, vengo ’sta sera
mo… tengo fretta
n’ata vota… ià…
n’ata vota… m’assecco
e parlammo.
.
Eeh… n’ata vota…
va bbuò…
va… fa’ chello ca hé fa’…
…N’ata vota.
Comme si ’u tiempo
fosse ’u nuosto !
Aggio tenuto ’u tiempo,
figliu mio,
e nun m’è bastato
pe parla’ cu te.
Pare ca nuie
simme padrune d’u tiempo
e invece
è ’u tiempo ca ce ioche
comme vo’ isso.
Ce gira attuorno,
ce fa credere
ca putimmo fa’ dimane
chello ca ogge
ce premme.
E invece no,
nun è accussì…
nun è accussì.
Quanno tiene ’a mano forte
nun strigne
pe’ paura ca puo’ rompe,
Puo’ fa’ male…
e mo…
’sta mana mia
è tesa surtanto
pe truva’
n’ata mana
c’a sustene.
Nun pozzo stregne cchiù.
’A rrobba sficchia
‘a dint ‘i dete.
Comme ’u viento
niente remmane.
Nemmeno ’i parole,
ca so’ fulate ‘i viento,
ce fanno ’ncuntra’.
.
Zi’ Veruccella,
pe’ coglie ’na rosa
se pugnette
e ce asceve ’u sangue.
“Nun fa niente – decette –
è meglio,
accussì m’arricordo
‘i quanta è bella
chesta rosa “.
Pe’ chella vota
chella goccia ‘i sangue
fermaie ’u tiempo.
Accussì gghié…
’a vita nosta,
nun è gratis.
Ie ‘aggio pagata
e saccio ’u prezzo.
A te pare
a buon mercato
e perciò ca dice
“…N’ata vota”.
Ma… guarda,
’u cielo è cagnato.
Pure ogge è fenuta ’a iurnata,
aah… ’sti dulure se fanno a senti’,
n’ ata vota, figliu mio,
va… va…
n’ata vota,
…te chiammo io.
.
.
Francesco De Luca
