di Francesco De Luca
Mantenimmece a vista
‘Nse po’ mai sape’…
ll’aria è fosca
e ‘stu mare sta crescenno fore misura…
Mantenimmece a vista…
ca si tenimmo bisogno
ce putimmo da’ ‘na mano
uno cu ll’ate.
Comm’e frate.
Certo… ‘na cosa so’ l’intenzione
e ‘na cosa so’ i fatte.
Teneno diente e ogne (1) affelate,
ca straccieno ‘a carne
‘i chi s’è fermato
pecché ‘u dulore mpietto
leva ‘u respiro,
o pecché a fatica ‘i campa’
ha spezzato ‘a fune d’u tiro.
Se scioglieno i cimme,
se perdono ll’ancore
ca ce faceveno sicuri,
e mo ca vulessemo truva’ gioia
recordanno i tiempe antiche
chiagnimmo aret’ i funerali
d’i cumpagne ca ce hanno lasciato.
Pe’ chello ca se po’…
mantenimmece a vista
ca n’è fenuto, no.
‘U viento tesa (2) e ‘u mare volle (3),
‘u fanale è miccio (4)
e ‘i forze so’ molle…
mantenimmece a vista…
e quanno vene
‘a botta ce trova ammagliate (5).
Si hamma cade’
cadimmo comm’e frate.
Note: 1 – unghie; 2 – si rafforza, 3 – si gonfia; 4 – fioco; 5 – stretti insieme.
Questa la versione recitata:
