di Francesco De Luca
.
So’ venuto d’ a Florida pe vede’ a mamma.
Quant’ anne so’ ca stongo luntano..?
So’ gghiute uaglione e mo so’ pensionato.
Eeeh… ’u besenisso (1) nun canosce dummeneche,
n’ ammette vacanze,
macina ’u tiempo comme n’ alleverate (2).
Vinne, accatte, cagne case,
mo tiene ’a giobbe (3) for’ a via
e mo ind’ a ’na farmeria (4).
’A panza cresce,
i ginucchie se ’ncrosteno,
’u core va c’ u freno a mano
e ’u colesterolo va in quarta.
Mo… ’nFlorida… è ’na vacanza continua,
senza penziere,
clima sereno,
aria fina.
Me manca ’a cumpagnia d’ a giuventù,
vulesse lascia’ nu ricordo
pe quanno ’nce stongo cchiù.
’A Florida chesto ’nt’ u permette,
là he fa’ ll’ arte ’ Mechelasse:
magne, bive e staie a spasse.
Cca… mamma sta ’ncopp’ ’a luvata,
stavota forse è l’ urtema vota
c’ aggia vista scetata.
Perciò… caro Franco…
me godo chello ca tengo,
’u sennuzzo (5) ’u trattengo
e faccio finta ’i niente
…’i niente.
(1) da business – affari; (2) ansioso; (3) da job – lavoro; (4) da farm – azienda agricola; (5) singhiozzo
