Sangue ‘i rutunne
di Franco De Luca
*
Leggila e ascoltala anche, detta dalla viva voce di Franco: Sangue ‘i rutunne
*
“Sangue ’i rutunne” ,
accussì ce chiammeno a nuie Punzise
quanno ce vonno recà offesa.
E pecché chest’ espressione,
ca pare senza pretese,
se porta dinto ’na calunnia cu’ tanto peso ?
Pecché i rutunne,
comme sanno pure i uagliune,
so’ pisce
ca teneno sangue senza culore,
comme acqua ’i mare.
Chesto…
pe’ dicere ca i Punzise
nun teneno carattere,
nun teneno palle;
passeno p’a storia
c’a capa avasce
e chijate ’i spalle.
Accussì è stato,
p’i duicientocinquant’anne passate,
e accussì è ogge
– scusate si ve faccio ’sta ripassata –
Accummenciaieno… vulenno poste separate:
i Furnise ’a ’na parte
e i Punzise ’a n’ ata.
E ancora ogge,
ca stammo ind’ u’ duimila,
spaccammo a duie
chillo che è nu sulo pilo.
Chesto c’ha purtato ?
Ca ce sta diffidenza, ce sta suspetto,
Po’ esse
Ca i saraghi d’u’ Puorto
vonno mette tutto ind’u’ manecone
e i Furnise hanna mantene ’u sacco a diùne?
Cammenammo sparpagliate,
nun facimmo quadrato
quanno ’a ciorte mena varrate,
e lamentammo l’indifferenza d’u’ Stato
e chiagnimmo ca pe nuie
maie festa c’è stata.
Nu poco ’i raggione, è vero,
pure ’a tenimmo,
pecchè ll’isola
n’ha maie luvata ’a famma
’i chi ce steva ’i casa.
A terra… era cchiù
chello ca se purtava annanze
u’ viento e ll’acqua ’i mare
ca chello ca ce deve pe’ campare.
U’ mare… era ricco sì
ma non pe’ tutte chille
ca ce fatecaveno.
E chistu destino ’i puvertà
c’ ha fatto sempe chijà ’a capa
verso ll’autorità,
verso i signure,
ca so’ buone sulo si tiene appaura.
Insomma,
’na bona vita n’aimmo fatta:
mo’… ’nsieme ai delinquente
prigioniere senza celle,
mo’… ’nsieme ai cuàtte,
nun tanto doce ’i sale,
e cu’ i militare,
sempe pretenziuse
verso ’a povera ggente.
Ecco… chesta è ’a verità !
Però… chella storia
sta aret’ i’ spalle,
mo è n’ata musica,
n’atu ballo.
U’ turismo
c’ha fatto deventà tutte signure,
cu’ case, sorde, e ’a badante pure.
Chell’aria ’i ggente mazzecata,
chella smorfia ’i ggente mortificata
’a avesseme perde.
’A avesseme pruvà
orgoglio, dignità, curaggio
e… quanno ce vo’,
pure ’nu poco ’i rraggia.
Nun simmo rutunne,
pe’ ddio,
simmo uommene
cu’ vuluntà, capa, vulìje.
Luvammece ’a cuollo
chesta maledizzione.
C’u’ sangue ca scorre
e c’a mente serena,
a signe russo,
scrivimmo ’a storia nosta.
E chesto basta !
