di Francesco De Luca
Iuorne ‘i festa
Ma che d’ è… stu mortorio ind’ a sta casa!
Mò vene ‘u primm’i ll’anno
e nun ce sta nu sparo,
na resata,
nce sta alleria !
Nemmeno ‘a fore
pruveneno botte ‘i tricchetracche (1)
e ‘i bottammuro (2).
Cu st’ aria moscia ‘i scirocco
pare ‘u iuorno d’ i muorte (3).
Ma… cu chi m’ a piglio?
Cu chi vaco musechianno (4)?
Nce stanno criature (5) ca gireno p’ i vicule,
nce stanno figliole ca fanno ascì ‘u sole,
nce stanno giuvinotte…
lloro s’arrauneno surtante ‘i notte.
Eh… che madonna…
songo rimaste sulo i viecchie.
Teneno sempe a dice…
so’ pronti ‘i vocca
e pronti a gghì ind’ u cesso
ma si no ‘a vescica ‘i ffa fessi.
Pot’ esse ca tutto se conclude
cu na grossa abbuffata…
… i serate calme stanno facenno strage ‘i calamare…
Va bbuono ‘a pastasciutta c’u sugo‘i pesce,
e pure ‘a frittura,
e pure ‘a menesta mmaretata,
c’ u vino ‘i copp’ i Cuonte,
i roccocò,
e ‘u sfumante ‘i Sarvatore ‘i Giuvantò
ma … p’ a miseria…
ce vo’ nu poco ‘i baldoria,
ma se no è na festa ‘i carcerate,
stammo fore c’ u naso all’aria
e chesto già ce fa priate (6)!
Zì Ntunì? Vide tu si ce può mette na pezza (7),
o posso contribuì surtanto accussì:
appiccio chistu frulla frulla (8)
e u porto p’ i stanze…
pot’ esse ca i stelline benedicieno chesta cumpagnia.
‘A vecchiaia ammo supportà
ma l’alleria ce avimmo procurà.
Nu frulla frulla è na pezzenterìa (9),
‘u capisco,
ma almeno me mecco mpace c’ a cuscienza:
aggio contribuito a purtà nu poco ‘i baldoria.
I feste
s’ hanno festeggià,
ma se no sta vita pesante
addeventa aggravante.
Note: 1 – fuoco d’ artificio; 2 – petardo; 3 – due novembre; 4 – lamentandomi; 5 – bambini; 6 – appagati; 7 – trovare un rimedio; 8 – candela magica; 9 – roba da pezzenti.
Versione recitata
