di Francesco De Luca
.
25 dicembre, Natale, zi’ ‘Ntunino confessa al nipote di voler mandare una poesia (qui sotto) a Ponzaracconta, come testimonianza del suo stato.
.
Zì Ntunino:
” ‘A dint’ ‘u scoglio russo
a vita è sempe ‘a stessa
ce pô ffà ‘a scummessa
chesta è ‘a verità.
Passeno ll’anne,
i dulure se spanneno
cresce l’affanno,
e… votte a campà.
I vicule so’ muorte,
senza uagliune,
‘nce sta cchiù nesciuno,
se sta comme se sta.
Senza cumpagnia,
avvelute ‘i malincunia,
‘u passato è passato,
e arreto ‘nse pô turnà.
Aspettammo ‘u futuro,
comme ‘na libberazzione,
cca stammo ‘mpriggione,
e scampo ‘nce sta.
Ammo perso ‘u petagno,
ll’ alliemme nun stagne,
ll’acqua ce bagna,
e stammo sempe cca.
Simme nate bbuone,
simme cresciute meglio,
po’… è succiesso ‘u ‘mbruoglio,
e ‘a vecchiaia mo a cummanna’
Che siente? Che è stato?
Te fusse scetato?
Duorme bbiate,
è meglio pe’ te.
Dimane t’aizze .
‘A fore che vide?
Quatte iatte ‘i ggente
senza capille e senza diente “.
” ‘U no’…
– responne ‘u nepote –
si manne ‘sta cosa a Ponzaracconta
faie ‘a figura d’u viecchio ‘nzallanuto.
Ce sta troppa malincunia…
‘u Bambeniello nun nasce…
cagne via.
Sta’ a senti’ a mme …
mannece i parole ‘i Pulecenella
ca fanno…:
‘uagliù… pigliammacella cu filosofia…
‘a vita pare ca cammina pe ‘na sola via,
ma ce ne stanne tant’ate,
arrete, annanze, a i late…
tutte diverse
e tutte priparate pe te fa’ cammena’
a secondo d’i possibbilità.
‘Nte da’ pe’ muorto,
nun perde ciato…
a tutti è data n’opportunità”.
Versione a voce
