di Francesco De Luca
Il dialetto gioca un ruolo importante nel Sito. L’ho sempre considerato un elemento di forte caratterizzazione. Nonostante la trasformazione di Ponza-racconta da sito ristretto nei confini isolani a sito dal respiro nazionale penso che gli apporti dialettali servano a rinsaldare il cordone ombelicale con la realtà ponzese.
‘U ppassato
Parlammo sempe d’u ppassato
quanno ce ncuntrammo
cu i frate
o cu i cumpagne d’a stessa aità.
Nce sta scampo:
‘a qualsiasi parte pigliammo ‘u discorso…
iammo sempe a fenì
a quanno se iucava a tics tocs e funtanelle (1);
a quanno i zuocchele teneveno i centrelle…(2)
insomma…
vantammo chillu tiempo
comme d’ a vita ‘u cchiù bello.
Eppure…
facevemo marenna cu pane e uoglie…
‘u maesto ce menava c’a bacchetta
e ‘u futuro nun teneva porte aperte.
Comme maie?
M’ u sapite spiegà?
E’ vero
se tratta d’ a giuventù
e allora tutto pare bello
comme ‘u mare blu.
E’ pure vero
ca i cose brutte
ce l’avimmo scurdate
pe corre appriesso a chello c’a vita ce ha appresentato.
Ma po’ esse
c’ avimmo guardà sempe arreto
pe ce truvà cuntente?
E’ comme si nce aspettassemo cchiù niente d’a ‘u futturo.
Comme si stessemo senza luce…
a ‘u scuro.
Comme si nun fossemo cchiù capace
‘i piglià d’ a vita ‘u meglio.
‘U meglio…?
Ma ‘u meglio che d’ é?
Nun è ‘a salute…
pecché chella
ghiuorno dopo iuorno
se ne va e ce saluta.
Nun è ‘a forza, nun è ‘a passione
e nemmeno ‘u sfizzio ‘i coglie l’occasione.
Cheste esperienze l’ aimmo fatte…
te iencheno ‘a panza, ‘a fantasia…
si te va bbuono…
si no…
so’ mpiccie
ca te fanno passà ‘u tiempo
ma…
nun t’ accuntenteno.
Stà a sentì: ancora n’ esperienza ce sta a fa’:
lascià perde ‘i pretenne
e pruvà a da’.
Si nte puorte niente appriesso,
allora…
spogliete d’u superchio, arape i porte,
leva ‘u cupierchio,
mittete a disposizzione dall’ ate.
Se deciarrà:
d’ a vita ha avuto,
ma ha pure dato.
Note: 1 – gioco con le biglie; 2 – scarpe estive di legno con rinforzo di metallo al di sotto.
La versione recitata
