di Francesco De Luca
–
A U G U R I
Il potere… che lo usino altri;
l’arroganza … sia dei politici;
la ricchezza … intasi lo stomaco dei sazi.
Che la serenità sia figlia della realtà.
Invio questa poesia con spirito d’ AUGURIO
I cambiale d’a vicchiaia
Me scordo tutte cose,
mecco na cosa llà…
e nunn’ a trovo.
Sbarèo (1) pe ’ ncoppo e pe sotto,
e sbatt’ ’ a capa
ca nun tene cchiù arrete a i penziere.
I nomme d’a ggente?
So’ ’ na maledizzione
e i cognome ancora ’ i cchiù,
’ nce sta modo ch’assommano mmocca (2)
e… primma ca cumpareno
ce vo’ a mano ’ i Ddio (3).
O si no, venene in aiuto
chi me sta vecino
e…
menu male…
…so’ ’ na grazzia!
Mo è muglièrema, mo so’ i figli
ma si no, cu ’ sta capa sciacqua (4)
fossero nummere (5) tutt’i vote.
Madò’ …
addò aggio mise i chiave?
Ind’i sacche no,
ncopp’u tavulino neanche.
So’ scumparse.
Chi s’a pigliate?
È sta capa fracede (6)
ca perde chello ca fa.
Che sta succedenno?
Sta succedenno ch’ a vecchiaia
appresenta i cambiale soie.
Pe tutt’a vita ammo firmato carte
ca pagavemo subbeto
cu ’a forza e a pruntezza d’a giuventù.
Mo nun tenimmo cchiù credito:
so’ tutte diebbete
ca pretenneno rimborsi,
ma ind’a cassa nun tenimmo cuntante.
E se rinfaccieno i debbulezze,
e se fanno a sent’ i mancanze,
e i defiette so’ male ’ i panza (7).
Chiove ncopp’a ’ sti spalle,
’ u viento ’ ntoppa (8) ’ a cammenata,
senza cappiello
e senza cappotto
m’agguanto a ’ na ringhiera
e aspetto.
Quanno ll’ora vene
’u ssaccio ca me tocca.
Ma… nun m’ avvelesco…
a vita l’aggio guardata ’ nfaccia
mo ’ a pozzo pure sunna’ .
Note: 1 – mi agito; 2 – vengano pronunciati; 3 – un aiuto divino; 4 – testa vuota; 5 – imprese impossibili;
6 – testa bacata; 7 – atroci; 8 – ostacola.
Questa la versione recitata
Immagine di copertina. Foto di Silveria Aroma
