di Teresa Pagano
Voglia ‘i turna’
L’onna sbatte contr’ i faragliune
Sciacqua i scogli
Fuiene ‘n cielo i roje
E i vocie ‘n cielo accumpagnene
‘u cuncierto d’u mare.
Ind’a curteglia arriva andore ‘i sale
che s’ammesca c’andore d’i giardini.
Me sonno tutte cheste ogni sera.
‘A luna ‘n coppa a Vientutene
che allustra ‘na via argiento
fino i canne arreta ‘a casa…
Casa mia…
I vricci che se tozzano a Chiai’i luna
i vie che iardene ind’a controra
i voce d’i creature ind’i marine
E ‘u vient’ ‘i maist’…
Vient’ che piega i vastacciétt’,
che fa scappa’ ‘a mare i piscature
che fa tremma’ i llastre d’i feneste
e me tene scetata ind’a nuttata.
Casa mia…
E ‘u calore d’u saluto d’a vicina
e ‘u sapore d’u roccocò ind’a vernata
Casa mia…
E’ ora ‘i turna’
M’aggio schiarita ‘a voce
Teng’ ll’età pe’ pute’ parla’!
antonio scotti
1 Febbraio 2016 at 14:51
Poesia stupenda e delicata che ti avvolge e ti abbraccia di nostalgia con rime che delineano a tutto tondo lo stato d’animo
Che dire brava Teresa non conoscevo la tua profonda vena poetica – La tua poesia è da annoverare tra le più belle che io abbia mai letto su Ponza