by Sang’ ’i Retunne
Giggino – ’Uagliò, ’a fusse vist’a Assuntina?
Sang’ ’i Retunne – Ah, finalmente sei tu a cercarla! Quella povera crista te chiamma d’a matin’a sera.
Gg – ’Ueee! I’ teng’ ate ’a che fa’. Ccà tenimm’a faticà! È chiaro?
SR – A sì? E pecché, Assuntina nun tène niente ’a fa’? Chella puverella me pare ’na Cenerentola.
Gg – E che c’entra. Essa tèn’ ’a fa ’i cose ’i femmena e l’hadda pure fa’ bone, si nò so’ mazzate.
SR – E sì, rispetto alle tue cose non sono niente vero?
Gg – E’ inutile che fai ’u saputiéll’. I ccose meie so’ chiù importànt’ d’i ssoie. Inzomma l’he vista o no?
SR – Ueee! Nun te ’ngazza’! …Non l’ho vista.
Gg – È che ’st’urdeme tiémp’ ’a vég’ strana: s’acconcia, se mett’i bigodini, s’amprufuma, se lav’i piéd’… Nunn è chiù essa.
SR – Embè? Non sei cuntento? Si fa più bella per te.
Gg – Pe’ me? Ma quann’ mai! I’ ’a voglie servatica, che sape ’i campagna, ch’andora ’i zimbr’, ’i cuniglie… e che cammina scàuze.
SR – E mamma mia che cafone che sei! Non cerchi mai di civilizzarti, di migliorarti: si’ ’na schifezza d’omme.
Gg – Siente… cafone o no, i’ si ’ll’acchiapp’ ca fa cose storte, faccie ’nu maciell’.
SR – Assuntina è ’na persona seria, nun è comm’e tte ca vaie scassanne àsteche e lavatore.
Gg – Uèee! Io so’ orme, e l’omme è cacciatore.
SR – Se se, e dalle che so’ cepolle! È ’na canzona vecchia ’a toia. Puverella: non l’hai mai fatta divertire, mai l’hai portata a fare un viaggio da qualche parte… delle volte basta poco.
Gg – Comme mai purtata a fa’ ’nu viaggio? E ’u viaggi ’i nozze?
SR – I’ che sfuorzo. E dove l’hai portata? …a Venezia?
Gg – Essa “vuleva” i’ a Venezia, ma i’ l’aggie purtata a Parmarola: ’u mare è chiù bello e po’ passavene ’i tortore…. Vuo’ mètte?
SR – Ma guard’a chisto! Si ’na rruina. Facesse buòn’ Assuntina a se vendica’!
Gg – Addimane ce vanghe appriéss’ …e vedimme si nun romp’u muss’ a cocchedune.
[Qualche giorno dopo]
SR – Giggi’, aggie saputo ch’he fatt’i nùmmer’ cu’ Assuntina. I ’llucche se senteveno d’a Calacaparra.
Gg – L’aggi’acchiappata ’ngopp’ u fatt’! …chella grande svergognata!
SR – A sì? Teneva l’amante?
Gg – No, qual’amante. Peggio! …peggio assaje.
SR – Mamma mia! Addirittura?
Gg – Nient’i’men’… ’na figlia ’i marenàr’ ’i vuzze, mugliére ’i marenàr’ ’i vuzze, cu’ i figli marenàr’ ’i paranze, se comporta a ’sta manera? Bruvogna a chella faccia!
SR – Ma se po’ sapé ch’ha fatto?
Gg – Chella puzzulenta traditrice… Nun se n’he gghiuta a fare ’nu ggiro ’ngopp’a chilli cazz’i gondole?
Quando l’aggia acchiappata m’ha ’itto: “Accussì te ’mpare a nun me purta’ a Venezia!”.
…’A foss’affugat’a mmare!
