di Francesco De Luca
Cca, ’u fatto è notte…
Chi era divoto e se vatteva ’mpietto
mo iastemma, e aspetta ’a morte pe’ despietto.
A ggente se cunsola c’a televisione
e pensa: quanta sorde farragge ’a prossima staggione.
Intanto ’stu vierno simme rimaste quatte iatte.
Rusecammo dinto e parlammo a schiatta.
E n’appicceco continuo:
c’u vicino, c’arrobba i prete d’i parracine,
c’u Comune, ca mette tasse a muntune.
Se vive ’i speranze:
farranno ’u Puorto,
farranno ’u cimitero,
farranno Chiailuna cu’ i sorde d’u cielo.
Ma a cinghia d’u cazone se stregne
e aumentano i dulure ’i panza,
aspettammo ca fenesce ’a nuttata
e ce sazziammo ’i ’iastemmate.
’U piatto è bello e cuotto:
cca, ’u fatto è notte.
