di Lino Catello Pagano
Chiane, chiù chiane…
i passe p’a via se fanne liggiére liggiére
e te pare ’i vula’,
chest’è Ponza quann’ arap’all’uocchie,
e se sceta d’u vierne e d’u suonne che c’è cadute ’ncuolle.
I primme song’ l’aucielle che vènen’a luntane;
s’appòsene e pòrtene allerìa.
Poi accummencene i fiùre ,
i vastacciette gialle e i rrose marine,
i rampicant’i tutt’i culure
e poi ’u vide d’i faccie d’a ggente
allère, quanne rirene cu’ i vocche aperte
e si nun te danne retta,
è pecché tènen’a ianghià ’a casa fore e dinte.
Culure pe’ fore comme ’u gialle d’i limune,
’u rose d’i rose, ’u bianc p’a pulizzia,
’u blu, ’u culore d’u ciél’,
e poie i culure chiù strane…
’u russ’ d’u puort’ e ’u marrone d’i ccase,
chelli vvie n’hanne viste’i tutt’i culure
mo ch’accumengia ’a stagione
e Ponza se ’ngegna ’u vestite nuov’ .
A ’sta cara isoletta venene ’i luonghe e se métten’i chiatt,
pe’ se piglia’ i post’ chiù belle
per fa’ l’affare senza fatica.
Poi fenùt’a stagione, c’i sacche chiene se ne vanno ’a do so’ venute
lasciann’ all’isola sultant’ i scart p’i poche ca rimanene
Chest’isola maltrattata, c’ù vient’ che soffia p’e vvie vacante
pure i ’uagliune se ne so’ ghiute,
so rimast chilli quatte viecchie
Ca dint’u bar passan’a iurnata e pure ’a serata
tra ’na briscla e ’nu tresett’a perdere,
’nu caffè e ’na birra, chi è capace s’a piglia.
Pure i piscature so’ fernute
la flotta è sflottata
so rimast quatte disperate
ca se metten ’ngopp ’u mare cu’ tutte ’i tempeste
pe’ purta’ annanze ’a famiglia
pe’ se guadagna’ ’nu iuorn ’i festa,
pe’ purta’ ’nu piscetiell’ a’ casa p’i criature.
Gente forte e curaggiosa, senza paura, con molto onore.
Ie ch’aggie passate là i tiempe belle ’i ’na vota,
quann sent’ ca cocchedune a Ponza se n’è ghiute
me vene ’na malincunia,
me ’uarde ’i fotografie e me ne torne là
ansieme a tutti chill’amici
ca cumm’a mme vivene ’i nustalgia
…ma ’a vogl’i turna’ nun ce sta
