di Franco De Luca
Ascolta qui la poesia detta da Franco: U Mare
U mare mena, u mare ‘nfoca,
u mare sciacqua abbasce lloco;
se sta accalmanno, se sta geranno,
‘ncapo a stasera ha fatto calmo.
U mare fète, che calmaria !
pure u uaglione po’ sta a prora via.
Che fa renfresca, se sta mettenno ?
Luvammo mano c’ u mare scumma.
Che levantata, chesta è cu’ i cazze,
paresse ca ce vulesse gnotte.
‘Stu mare ‘cca dura tre gghiuorne,
po’ sta sicuro, t’u po’ ffà u suonno.
Vide a Parata che mare ié,
si no dimane chi s’aizza ‘i tre:
si fore i refule ‘ncrespeno ll’onne
i rezze ‘i remmanimmo ‘nfunno;
si invece i Furmicule so’ quiete
dimane ammatina vengo e te scete.
U mare ind’ i Scuglietelle
t’arricorda c’ u viaggio nun è bello.
U mare ind’ u puorto
T’arricorda: quanno trase statte accorto.
‘Stu mare è patre, ‘stu mare è frate,
stu mare cca cu nuie è nato.
Quanno isso allucca ‘ncopp’ i scoglie
ce appaurammo e ce strignimmo i figli;
quanno ce ’nvita a ffà i patelle
ce arapimmo u core a passà a staggiona bella.
‘Stu mare è scola, stu mare è vita.
Voglio murì, ma nfacci’ u mare me mettite
Da: “All’ anema ‘i Ponza” – edizione Odisseo 1981 – Francesco De Luca
