dalla Redazione di ponzaracconta
Locandina serata-Miniera (guarda qui)
‘A Miniera
(Poesia d Franco De Luca)
‘A miniera è ancora ’na ferita
che spacca u’ cuorpo
d’i Forne.
Ne so’ passate d’anne,
ma chelle muntagnole ianche,
chillu fuosso scavato
ricordeno i patemiente
c’a ggente
ha pruvato
quanno purtava for’ i ruttune
a taglimme ianca,
ca spellava i’ mmane
e ’ntussecava i purmune.
’A miniera
era nu lavoro
ca deve a’ magnà’,
pure si faceva chiagnere
tanta paisane.
Pecchè famiglie intere
perdetteno a casa
e se ne ietteno a ll’ Elba.
E addò ce steve
’na compagnia ’i core
addeventaie terra arrevutata
addò se poseno i’ rroie.
I’ nnave abbasce a Cala dall’Acqua
incheveno i stive ’i cauline,
e i’ ccase franavano,
e ’a ggente se sperdeva
’ncerca ’i nu destino.
U’ sinneco Sandolo
faceva finta ’i nun sape’,
ma for’a casa soia
’a folla s’ammassava
pe purta’
galline, pisce, ove e vino:
“pecché u’ sinneco nuost’
adda stà chin’ ’i salute e tuost”.
Cummannava c’a paura :
e quanno i’ persone
’nse senteno sicure
se venneno u’ coraggio e u’ futuro.
’A miniera
spertusava Calicaparra.
I’ montagnole cresceveno
tutt’attuorno;
u’ viento spanneva ’a porvere
’ncopp’ all’asteche
addò ’nfettava ll’acque;
’a ggente mureva ’i silicosi;
i’ vvie se scarrupaveno
ma ’a miniera scavava senza perde ciato
e ’a caulina faceva mercato.
I’ sòrde però nun venceno
U’ dolore,
’a ricchezza
nun leva ’a voce
a chi soffre.
I Furnise
libere du schiaffo ’i Sandolo
addeventaieno Punzise
e i Punzise se sentetten’ Furnise.
Don Mario Vitiello
chiudette ’a miniera,
e a u’ bianchetto mettette u’ lucchetto
Nun fuie ’na preghiera,
e nemmanco ’na pensata
d’a matina a’ sera,
fuie comme ’na primmavera
ca s’abbattette ’ncopp’ u’ paese.
Pure don Gennaro
sunaie i’ campane
e Calicaparra
uardaie cu’ speranze u’ dimane.
Ogge,
doppo tant’anne,
chella terra ianca
e chillu scavo ’nfussato
so’ comme ’na ferita aperta
c’aspetta ’a sutura.
’Na terra maledetta,
pare,
“a terra d’u bianchetto”.
Franco De Luca (Marzo 2009)
