Proposta da Ernesto Prudente
‘O mare
«’O mare fa paura».
Accussì dice ‘a ggente
guardanno ‘o mare calmo,
calmo cumme ‘na tavula.
E dice ‘o stesso pure
dint’ ‘e gghiurnate ‘e vierno
quanno ‘o mare
s’aizza,
e l’onne saglieno
primm’ a palazz’ ‘e casa
e po’ a muntagne.
Vergine santa…
scanza ‘e figlie ‘e mamma!
Certo,
pe’ chi se trova
cu ‘nu mare ‘ntempesta
e perde ‘a vita,
fa pena.
E ssongo ‘o primmo
a penza’ ‘ncapo a me:
«Che brutta morte ha fatto
‘stu pover’ommo,
e che mumento triste ch’ha passato».
Ma nun è muorto acciso.
È muorto a mmare.
‘O mare nun accide.
‘O mare è mmare,
e nun ‘o sape ca te fa paura.
Io quanno ‘o sento…
specialmente ‘e notte
quanno vatte ‘a scugliera
e caccia ‘e mmane…
migliara ‘e mane
e braccia
e ggamme
e spalle…
arraggiuso cumm’è
nun se ne mporta
ca ce straccia ‘a scugliera
e vveco ca s’ ‘e ttira
e se schiaffea
e caparbio,
‘mperruso,
cucciuto,
‘e ccaccia n’ata vota
e s’aiuta c’ ‘a capa
‘e spalle
‘e bracce
ch’ ‘e piede
e cu ‘e ddenocchie
e ride
e chiagne
pecché vulesse ‘o spazio pe’ sfuca’…
Io quanno ‘o sento,
specialmente ‘e notte,
cumme stevo dicenno,
nun è ca dico:
«’0 mare fa paura»,
ma dico:
«’0 mare sta facenno ‘o mare».
(Eduardo 1968)
![](https://www.ponzaracconta.it/wp-content/uploads/2021/11/Schermata2021-11-06alle03.23.17.png)